កណ្តាល៖ មានការប្រទះឃើញកុមារអាយុ ៣ខែ លង់ទឹកនៅក្នុងផ្ទះរបស់ខ្លួន ស្ថិតនៅក្នុងឃុំព្រែកតាមាក់ ស្រុកខ្សាច់កណ្តាល ខេត្តកណ្តាល នៅវេលាម៉ោង៩ព្រឹក ថ្ងៃទី៨ ខែកញ្ញា ឆ្នាំ២០២៣។ ករណីនេះក្រុមការងារស៊ើបអង្កេតបទល្មើសឃាតកម្ម (HIT) និងក្រុមការងារបច្ចេកទេសវិទ្យាសាស្រ្ត (FST) នៃអង្គភាពការពារកុមារ (CPU) បានឆ្លើយតបចំពោះពត៌មាននេះ។
នៅពេលទៅដល់កន្លែងកើតហេតុ ក្រុមការងាររបស់អង្គភាពការពារកុមារ (CPU) បានទទួលពត៌មានអំពីរឿងហេតុពីមន្ត្រីនគរបាលខេត្តកណ្តាល។ ក្រុមការងារស៊ើបអង្កេតបទល្មើសឃាតកម្ម (HIT) និងក្រុមការងារបច្ចេកទេសវិទ្យាសាស្រ្ត (FST) នៃអង្គភាពការពារកុមារ (CPU) ក្នុងកិច្ចសហប្រតិបត្តិការជាមួយការិយាល័យបច្ចេកទេស និងវិទ្យាសាស្រ្ត នៃស្នងការដ្ឋាននគរបាលខេត្តកណ្តាល បានប្រតិបត្តិការពិនិត្យកន្លែងកើតហេតុ និងបានធ្វើកោសល្យវិច័យទៅលើសាកសពកុមារ។កម្លាំងជំនាញក៏បានកំណត់ថា ការស្លាប់នេះបង្កដោយអំពើឃាតកម្ម។ អ្នកជិតខាង និងសាកស្សីជាច្រើននាក់ត្រូវបានកម្លាំងសមត្ថកិច្ចធ្វើការសាកសួរ ហើយក្នុងរយៈពេល ៣ម៉ោង ម្តាយបង្កើតរបស់កុមាររងគ្រោះត្រូវបានកម្លាំងជំនាញកំណត់ជាមុខសញ្ញាសង្ស័យ។
ម្តាយកុមាររងគ្រោះ ដែលមានអាយុ២៤ឆ្នាំ ត្រូវបានកម្លាំងសមត្ថកិច្ចបញ្ជូនទៅស្នងការដ្ឋាននគរបាលខេត្តកណ្តាលដើម្បីធ្វើការសាកសួរបន្ថែម រហូតឈានទៅដល់ការឆ្លើយសារភាពអំពីសកម្មភាពសម្លាប់កូនរបស់ខ្លួន និងត្រូវបានកម្លាំងសមត្ថកិច្ចចោតពីបទឃាតកម្មដោយចេទនា៕
